Tit 2 | MHL | STEP | Aria no Mua Maneka opora maemi kakeniw wia maakeya opora baliwep ookuk.

Titus 2

Taitus suule wiemi Kristen sira eliwa wia ofakowinok

1 Aria no Mua Maneka opora maemi kakeniw wia maakeya opora baliwep ookuk. 2 Wi mua iperowa suule wieya saria opuk, kema pukep ikauk ne mia kookalowa sira-sira wiam kaikap ikauk. Mua Maneka opora kakeniw opuk, mua oko wia kookaluk ne kekanep pina kamenap wiar imenariya nain eliw akuawuk.

3 Ne sira naapiw, wi emer iperowa pun wia maakeya saria sira eliwa-pa ikauk, murarow opora me wiam onuk, ne eka kekanowa me eruaruk. 4 Wi baliwep ikok wi aakis teeria nain sira eliwa wia ofakowuk. Naeya sira eliwa wia maakiwkin eliw wiena mua wia baliwami muuka wiipa pun baliwep wia kakaltuk. 5 Wi baliwep ikauk, soma me oruk. Uuwowa baliwep onami wiena mua opora wia miimami opora me wiar fienuk. Naap oniwkin wi sisin mua sira eliwa wiar urufap Mua Maneka opora wiar firekowa nain era marew.

6 Ne wi mua moren takira pun naap, kema wia iikiroweya mia kookalowa sira-sira wiam kaikap ikauk. 7 No nena pun baliwep ikaeya wi nefa urufap sira nookuk. Ne no opora wia maakin nain niirow opora saarik me one, opora make-makeniw wia maake. 8 Opora pupep oram puukap wia maake, naeya wi opora nefar fienowa nain kookopikuan. Wi opor ara kaanek iimarep opora yiar poraikuan, weetak. Naap maep emina ururikuan.

9 Aria wi uuwow mua sesa marew uuwimik nain feenap wia maake, wiena saria opora wiar miimami maa unowa wi kookalimik naap wiokow muutiw. Opora wia maakiwkin me wia kiripomuk. 10 Ne maa me wiar ikum aawuk. Wi uuwow mua eliwa, ne anane sira makeniw ookiwkin naap wia urufap mauk, “Aa, wi Mua Maneka opora ookimik nain wi sira makena-pa ikaimik.” Naemi Mua Maneka eena i yia aawiya nain opora wiar kookalep eliwa-ke nauk.

11 Wi unowiya baliwep ikauk, moram Mua Maneka yia kemalek nain ariman wuami i miiw mua unowiya yia aawowa era yia wuomak. 12 Naap onami yia paayawiya, sira feenap onowa, sira samo-samora onowa nain mikikira-pa wuowa-ke, ne mia kookalowa me ookowa-ke. Aria yiam saliwami baliwep ikok Mua Maneka sira ookowa-ke. 13 Ne i miiwa-pa feek ikok naap onami Yeesus Krais ekapowa nain kemaiw yiam tuupam-ikok arewap ikaiyen. Yeesus Krais yiena Mua Maneka eena i yia aawow mua ona kekanowa-pa parin onaiya imenarowa, mua nain. 14 I miiw mua pina-pa ikok umemi mesenalimik, nain os-ke i epa yiar aawep umok. Fain naep umok, wi pina onowa-pa ikaiwkin wia aawemkun yena teeria kakeniw efar ikok kema dubila ne sira kakeniw ikauk, ne palanemi sira eliwa onowa kemaiw ikauk, naap maek. 15 Naapeya no uuwowa nanek, kekanow onaiya ikon. No suule wiemi kema wia iikirowam-ike. Ne wi Yeesus Krais opora kapewimik nain pun wia kakenami ifana wiare. Ne mua kuisow-ko no opora me nefar porainok.